Dar es Salaam – Moto wa Ligi Kuu NBC Tanzania Bara unaendelea kuwashwa kesho Jumatano Oktoba 1 mwaka 2025 ambapo miamba wa soka wa Tanzania Simba SC wanashuka dimbani kuvaana na Namungo FC katika mchezo utakaopigwa saa 2:15 usiku kwenye Uwanja wa KMC jijini Dar es Salaam
Simba wakiingia kwenye mchezo huu wakiwa na kumbukumbu nzuri dhidi ya Namungo wana rekodi ya kutoshindwa katika michezo 12 iliyopita. Wameibuka na ushindi mara saba huku mechi tano zikimalizika kwa sare. Mara ya mwisho timu hizi zilikutana Wekundu wa Msimbazi waliibuka na ushindi wa mabao matatu kwa bila jambo linaloongeza ari yao kuelekea pambano hili
Kwa upande wa hali za timu Simba SC wanaingia wakiwa na matokeo ya kubadilika katika wiki za karibuni. Licha ya kuonyesha uwezo wa kufunga mabao muhimu dhidi ya Gaborone United pia walipoteza baadhi ya michezo ya mashindano ya ndani jambo linaloonyesha bado wanatafuta uthabiti. Kikosi kitatakiwa kumkosa Mohamed Bajaber na Abdulazak Hamza ambao ni majeruhi lakini kocha msaidizi Seleman Matola amesisitiza kuwa maandalizi yamekamilika na morali ipo juu
Namungo FC nao wanaanza msimu wakiwa na matokeo ya wastani baada ya kulazimisha sare dhidi ya Pamba Jiji na kuibuka na ushindi dhidi ya Ken Gold. Kikosi chao kimekuwa na uimara wa kiulinzi lakini changamoto kubwa imekuwa uwezo wa kupata mabao. Nidhamu ya kiufundi imekuwa silaha yao kubwa na mara nyingi wamekuwa wakicheza kwa kujilinda kisha kushambulia kwa kushtukiza
Kitaalamu pambano hili linaashiria mapambano ya mbinu kati ya timu mbili zenye mitindo tofauti ya uchezaji. Simba wanapendelea mfumo wa kushambulia kwa kasi kupitia wachezaji wa pembeni na washambuliaji wa kati wenye nguvu huku wakitengeneza nafasi nyingi kupitia mipira ya haraka kutoka kiwanjani. Namungo kwa upande wao mara nyingi hutumia muundo wa kujilinda kwa wachezaji wengi nyuma kisha kujaribu kutumia mapengo kwa counter attack. Ikiwa Simba watashindwa kupata bao la mapema mchezo unaweza kuwa mgumu kwao kwani Namungo watapata ujasiri wa kuongeza presha katika dakika za lala salama
Hata hivyo ubora wa kikosi cha Simba na uzoefu wao katika michezo mikubwa unaonekana kuwapa nafasi ya kuibuka na ushindi. Namungo watahitaji nidhamu ya hali ya juu na ufanisi mkubwa mbele ya lango la Simba ili kuvunja nukta ya kihistoria ya kupata ushindi wa kwanza dhidi ya wekundu wa Msimbazi. Kwa mashabiki wa soka wa Tanzania huu ni mchezo wa kufuatilia kwa karibu kwani unahusisha vita ya kimbinu na vita ya rekodi ambazo zinaamua mustakabali wa mwanzo wa msimu
0 Comments