Hamas yathibitisha vifo vya Abu Obeida na viongozi wengine wakuu wa kijeshi

 

Kundi la Kipalestina la Hamas limethibitisha kifo cha msemaji wake wa kijeshi, Abu Obeida, pamoja na Mohammed Sinwar, aliyekuwa kiongozi wa zamani wa Gaza, wakidaiwa kuuawa na jeshi la Israel.

Kupitia taarifa rasmi iliyotolewa Jumatatu na Brigedi za Izz ad-Din al-Qassam, tawi la kijeshi la Hamas, kundi hilo pia lilithibitisha vifo vya Mohammed Shabanah, kiongozi wa tawi la Rafah, pamoja na viongozi wengine wawili wa ngazi ya juu, Hakam al-Issi na Raed Saad.

Jeshi la Israel lilikuwa limedai mwezi Mei kuwa lilimuua Mohammed Sinwar, kaka mdogo wa aliyekuwa kiongozi mkuu wa Hamas, Yahya Sinwar. Miezi mitatu baadaye, Israel ilitangaza pia kuwa ilikuwa imemuua Abu Obeida, madai ambayo sasa yamepata uthibitisho rasmi kutoka Hamas.

Katika taarifa yake, Hamas ilifichua kuwa jina halisi la Abu Obeida lilikuwa Huthaifa al-Kahlout. Abu Obeida alikuwa mmoja wa nyuso na sauti maarufu zaidi za Hamas, akihudumu kama msemaji mkuu wa kijeshi tangu miaka ya nyuma, akitoa taarifa kuhusu mwenendo wa mapigano, madai ya ukiukwaji wa makubaliano ya kusitisha mapigano, pamoja na masuala ya kubadilishana wafungwa kati ya Wapalestina na Israel.

Taarifa ya mwisho ya Abu Obeida ilitolewa mwanzoni mwa mwezi Septemba, wakati Israel ilipoanza hatua za awali za kile ilichokiita operesheni mpya ya kijeshi katika Jiji la Gaza, ikilitangaza eneo hilo kuwa uwanja wa mapambano. Mashambulizi hayo yalisababisha uharibifu mkubwa wa makazi na kuwalazimisha mamilioni ya Wapalestina kuyahama makazi yao.

Vifo vya Sinwar na Abu Obeida vinaongeza orodha ya viongozi wa juu wa Hamas waliothibitishwa kuuawa katika kipindi cha miaka miwili iliyopita. Miongoni mwao ni aliyekuwa kiongozi wa kisiasa wa Hamas Yahya Sinwar, kamanda mkuu wa kijeshi Mohammed Deif, mmoja wa waanzilishi wa Brigedi za Qassam katika miaka ya 1990, pamoja na kiongozi wa kisiasa Ismail Haniyeh, ambaye aliripotiwa kuuawa katika mji mkuu wa Iran, Tehran.

Maendeleo haya yanaendelea kuashiria mabadiliko makubwa katika uongozi wa Hamas huku vita kati ya Israel na Hamas vikiendelea kushika kasi katika Ukanda wa Gaza.