Dar es Salaam, Tanzania – Mashabiki wa Azam FC wamepata faraja kubwa baada ya kikosi chao kuanza vyema safari ya Kombe la Shirikisho la Afrika kwa ushindi wa mabao 2-0 dhidi ya El Merreikh Bentiu ya Sudan Kusini, mchezo uliopigwa leo kwenye Uwanja wa Taifa wa Juba. Matokeo hayo yanaipa Azam nafasi nzuri ya kufuzu hatua ya pili ya mashindano hayo.
Mabao ya Azam yalifungwa na mastaa wawili waliowaka moto uwanjani – Feisal Salum 'Fei Toto' na Jephte Kitambala. Fei Toto alifungua ukurasa wa mabao dakika ya 23 baada ya kuutumia vyema mpira uliotemwa na kipa wa El Merreikh kufuatia krosi safi ya Pascal Msindo. Bao hilo liliwasha moto wa mchezo na kuongeza hamasa kwa wachezaji wa Azam.
Kipindi cha pili kilishuhudia Azam ikiongeza kasi ya mashambulizi, na hatimaye dakika ya 70 Kitambala aliweka mambo 2-0 kwa shuti kali baada ya kupokea pasi murua kutoka kwa Baraket Hmidi. Bao hilo lilionekana kuzima kabisa matumaini ya wenyeji na kuiweka Azam katika nafasi ya kutawala mchezo hadi dakika ya mwisho.
Azam sasa inahitaji angalau sare katika mchezo wa marudiano utakaochezwa jijini Dar es Salaam ili kutinga raundi inayofuata. Mshindi wa jumla katika mchezo huu atakutana na kati ya KMKM ya Zanzibar na AS Port ya Djibouti.
Mlandege FC Yakwama Addis Ababa
Kwa upande mwingine, safari ya wawakilishi wa Zanzibar kwenye Ligi ya Mabingwa Afrika, Mlandege FC, imeanza kwa tabu baada ya kuchapwa mabao 2-0 na Ethiopian Insurance kwenye Uwanja wa Abebe Bikila, jijini Addis Ababa.
Matokeo hayo yanaifanya Mlandege kuhitaji ushindi wa angalau mabao matatu kwenye mchezo wa marudiano ili kuendelea na safari ya Afrika. Ushindi wa 2-0 utaibua matuta ya mikwaju ya penalti, hali inayoongeza ugumu kwa wawakilishi hao wa Visiwani.
Mshindi wa jumla katika mchezo huo atakutana na kati ya APR ya Rwanda na Pyramids FC ya Misri.
Hali hii inamaanisha wakati Azam FC inatia matumaini kwa Watanzania, Mlandege FC inalazimika kupanda mlima mrefu ili kuendelea na ndoto za bara.
0 Comments