Nyota wa zamani wa Yanga SC, Fiston Mayele, ameendelea kuthibitisha ubora wake barani Afrika na kwingineko baada ya kuipeleka klabu yake ya Pyramids FC kutwaa ubingwa wa Kombe la FIFA la African-Asian-Pacific. Katika fainali iliyopigwa Septemba 25, 2025 dhidi ya Al Ahli ya Saudi Arabia, Mayele aling’ara kwa kufunga hat-trick na kuiwezesha timu yake kushinda kwa mabao 3-1.
Mabao yake matatu yalipatikana dakika ya 21, 71 na 75, yakidhihirisha uwezo wake wa kufumania nyavu katika nyakati muhimu. Ivan Toney alifunga bao pekee la kufutia machozi kwa upande wa Al Ahli, lakini umakini wa mashabiki ulimlenga Mayele ambaye alibaki kuwa shujaa wa mchezo huo.
Mafanikio haya yanamjia Mayele miezi michache tu baada ya kushinda tuzo ya mfungaji bora wa Ligi ya Mabingwa Afrika kwa mabao sita. Nyota huyo pia anabaki na kumbukumbu ya kutwaa kiatu cha dhahabu cha Ligi Kuu Tanzania Bara msimu wa 2022/2023 akiwa na Yanga SC.
Mara baada ya mchezo, Mayele alielekea nchini Saudi Arabia kwa ajili ya ibada ya Umrah, na kupitia ukurasa wake wa Instagram alituma picha akimshukuru Mwenyezi Mungu kwa mafanikio hayo.
Mayele, aliyesajiliwa na Pyramids mwaka 2023 kutoka Yanga, sasa anaonekana kuwa nguzo muhimu ya klabu hiyo, huku thamani yake sokoni ikizidi kupanda. Pia, kiwango chake kimeimarisha nafasi yake katika timu ya taifa ya DR Congo, ambapo anachukuliwa kama mmoja wa washambuliaji hatari zaidi wa kizazi chake barani Afrika.
0 Comments