Lilongwe, Malawi – Uchaguzi Mkuu wa Malawi umehitimishwa kwa mshangao wa kisiasa, baada ya wapiga kura kumkataa Rais aliyemaliza muda wake, Lazarus Chakwera, na kumrejesha madarakani Rais wa zamani, Peter Mutharika, kwa kura asilimia 56 dhidi ya 33% alizopata Chakwera.
Tume ya Taifa ya Uchaguzi ilitangaza matokeo rasmi, ikibainisha kwamba matokeo hayo yameakisi kwa kiasi kikubwa mwelekeo wa wapiga kura waliotaka mabadiliko kutokana na misukosuko ya kiuchumi iliyoikumba Malawi katika kipindi cha miaka mitano iliyopita.
Katika hatua iliyotafsiriwa kama mfano wa demokrasia ya kukomaa, Rais Chakwera alihitimisha ndoto yake ya muhula wa pili kwa kukiri kushindwa. Katika hotuba yake kwa taifa, alisisitiza kuwa anakubali uamuzi wa wananchi na kwamba hana nia ya kuzuia mchakato wa kidemokrasia:
> “Ninajua kwamba kwa wengi wenu mliopiga kura, matokeo haya ni taswira ya nia yenu ya pamoja ya kuwa na mabadiliko ya serikali, na hivyo ni sawa kukubali kushindwa kutokana na kuheshimu matakwa yenu kama raia,” alisema Chakwera.
Rais huyo aliyemaliza muda wake pia alifichua kuwa amempigia simu Mutharika kumpongeza kwa “ushindi wake wa kihistoria”, na akawahimiza wananchi wote – wa kushinda na waliopoteza – kudumisha amani.
Hata hivyo, Chakwera alikiri kuwa aliwahi kufungua shauri mahakamani akitaka kuzuia kutangazwa kwa matokeo, lakini baada ya mahakama kuamuru tume iendelee na taratibu, alikubali hukumu hiyo na akaamua kutanguliza maslahi ya taifa.
Kwa upande wake, ushindi wa Mutharika unafungua ukurasa mpya wa kisiasa kwa Malawi. Wataalamu wa siasa wanasema kurejea kwake kunatarajiwa kuibua mjadala mpana juu ya mustakabali wa sera za uchumi, hasa ikizingatiwa changamoto kubwa za mfumuko wa bei na ukosefu wa ajira zilizolisakama taifa hilo.
Kurejea kwa Mutharika pia kunaashiria uamuzi wa wapiga kura kutathmini upya rekodi ya uongozi wake wa awali, ambapo licha ya lawama kadhaa, alijijengea sifa katika miradi ya miundombinu na usawa wa kifedha.
Kwa ujumla, uchaguzi huu umetajwa kama mtihani muhimu wa uthabiti wa demokrasia ya Malawi, na dunia inasubiri kuona namna serikali mpya itakavyojenga maridhiano ya kisiasa na kurejesha imani ya wananchi katika taasisi za umma.
0 Comments