Tanga, Tanzania – Jeshi la Polisi Mkoa wa Tanga limetoa onyo kali kwa wanafunzi wa kike kuacha mara moja tabia ya kupiga na kuhifadhi picha za utupu kwenye simu zao, likieleza kuwa kitendo hicho kimekuwa chanzo cha madhara makubwa ya kisaikolojia na kijamii.
Onyo hilo limetolewa katika mahafali ya kidato cha nne katika Shule ya Seminari ya Wasichana ya Alkheir, ambapo polisi walibainisha kuwa usambazaji wa picha hizo mitandaoni umesababisha aibu, unyanyasaji, na katika baadhi ya matukio, wanafunzi kujaribu au hata kujitoa uhai.
Afisa wa Dawati la Kupinga Ukatili wa Kijinsia Mkoa wa Tanga, Happy Milanzi, alionya wanafunzi kutumia simu kwa malengo sahihi, akisisitiza kuwa kifaa hicho kinaweza kuwa “bomu” linaloweza kulipua maisha ya mtu endapo taarifa binafsi zitaangukia mikononi mwa watu wasiofaa.
Akiongeza, Tabia Manjonjo kutoka Dawati la Wilaya ya Tanga aliwakumbusha wanafunzi kuzingatia maadili waliyofundishwa shuleni, akibainisha kuwa vijana ndio kundi linaloathirika zaidi na unyanyasaji wa mtandaoni.
Katika tukio hilo, Mkuu wa Shule Sheha Mohamed Sheha alitoa taarifa ya mafanikio ya shule katika mitihani ya kitaifa, huku Sheikh Farhat, mmoja wa wakurugenzi wa shirika la Direct Aid, akiahidi kufanya ukarabati mkubwa shuleni na kuongeza idadi ya wanafunzi watakaopata ufadhili wa masomo ya juu.
Wanafunzi kupitia risala iliyosomwa na Mwamvita Khatib na Sheha Ibrahim, waliomba msaada kwa wenzao wenye changamoto za kifedha ili wapate fursa ya kuendelea na masomo katika ngazi ya juu.
0 Comments