Dar es Salaam, Septemba 28, 2025 — Klabu za Tanzania, Simba SC na Azam FC, zimefanikiwa kusonga mbele katika michuano ya Ligi ya Mabingwa Afrika na Kombe la Shirikisho Afrika baada ya kupata matokeo chanya katika michezo yao ya marudiano.
Simba SC yapenya kwa tabu
Simba imetinga raundi ya pili ya Ligi ya Mabingwa Afrika kwa jumla ya mabao 2-1 dhidi ya Gaborone United ya Botswana. Katika mchezo wa marudiano uliofanyika Uwanja wa Benjamin Mkapa, Simba ililazimishwa sare ya 1-1.
Jean Charles Ahoua aliiweka Simba mbele dakika ya 43 kupitia mkwaju wa penalti baada ya Morice Abraham kuchezewa rafu ndani ya eneo la hatari. Hata hivyo, dakika ya 58, Lebogang Ditsele aliisawazishia Gaborone United pia kwa mkwaju wa penalti kufuatia beki Chamou Karaboue kumchezea vibaya mshambuliaji wa wapinzani.
Licha ya juhudi za Gaborone kupata bao la pili, mechi ilimalizika kwa sare. Matokeo hayo yaliihakikishia Simba tiketi ya kusonga mbele na sasa itakutana na Nsingizini Hotspurs ya Eswatini katika raundi ya pili. Baadhi ya mashabiki wa Simba wameeleza kutoridhishwa na kiwango cha kikosi chao, wakisisitiza umuhimu wa maboresho kabla ya hatua inayofuata.
Azam FC yathibitisha ubora
Katika mchezo mwingine uliopigwa Azam Complex, Azam FC imeonyesha ubabe kwa kuichapa El Merreikh Bentiu ya Sudan Kusini kwa mabao 2-0, na hivyo kusonga raundi ya pili ya Kombe la Shirikisho Afrika kwa ushindi wa jumla wa 4-0.
Mabao ya Azam yalifungwa na Yoro Diaby dakika ya 18 na Nassor Saadun katika dakika za majeruhi. Ushindi huo umeendeleza rekodi nzuri ya kikosi cha kocha Youssouph Dabo, ambacho sasa kitakutana na KMKM ya Zanzibar katika hatua inayofuata.
0 Comments