Kocha mkuu wa Gaborone United, Dimitar Pantev, ameagana rasmi na mabingwa hao wa Botswana na yuko katika hatua za mwisho za kukamilisha mchakato wa kujiunga na klabu ya Simba SC ya Tanzania.
Kupitia taarifa iliyotolewa na uongozi wa Gaborone United, klabu imethibitisha kwamba Pantev aliomba kuvunja mkataba wake kwa haraka na ombi hilo lilikubaliwa. Baada ya hatua hiyo, kocha huyo aliwaaga wachezaji pamoja na maafisa wa benchi la ufundi kabla ya kuondoka. Gaborone United ilimshukuru kwa mchango wake mkubwa, hasa akiwasaidia kutwaa ubingwa wa Ligi Kuu ya Botswana msimu wa 2024/2025.
Kwa mujibu wa taarifa kutoka ndani ya Simba, Pantev ndiye chaguo jipya la benchi la ufundi kuchukua nafasi ya Fadlu Davids, aliyefungasha virago na kujiunga na Raja Casablanca ya Morocco. Vyanzo vya ndani ya klabu hiyo vimeeleza kuwa uongozi wa Simba umekuwa ukivutiwa na mtindo wa Pantev wa kusisitiza mpira wa kasi, pasi nyingi na mashambulizi ya moja kwa moja, falsafa inayochukuliwa kuwa sahihi kwa timu yenye malengo ya kufanya vyema kimataifa.
Kocha huyo mwenye uraia wa Bulgaria anabeba uzoefu mkubwa, akiwa na leseni ya Ukocha ya Daraja la Juu kutoka UEFA, jambo linaloongeza hadhi yake na kumpa uhalali wa kusimamia klabu zenye matarajio makubwa barani. Uwezo wake wa kuboresha nidhamu ya kiufundi, kusuka mbinu za ushambuliaji na kuandaa timu zenye ushindani mkubwa ni mambo yaliyomvutia uongozi wa Wekundu wa Msimbazi.
Iwapo dili hili litakamilika kama inavyotarajiwa, Simba SC itakuwa imepata kocha mwenye falsafa ya soka la kisasa, huku mashabiki na wadau wa soka nchini wakisubiri kuona namna atakavyoweza kuimarisha kikosi na kukipeleka hatua nyingine kwenye michuano ya ndani na kimataifa.
0 Comments