Raila Odinga Afariki Dunia Akiwa India, Rais Ruto Atoa Taarifa Rasmi

 

Dar es Salaam. Jumuiya ya Afrika Mashariki, na hususan Kenya, leo inakumbwa na simanzi kubwa kufuatia taarifa za kifo cha aliyekuwa Waziri Mkuu na kiongozi mkuu wa upinzani nchini humo, Raila Amolo Odinga.

​Kiongozi huyo, aliyefahamika kwa jina la utani la ‘Baba’, amefariki dunia akiwa na umri wa miaka 80, Jumanne ya Oktoba 15, 2025. Taarifa hizi za kuhuzunisha zimethibitishwa na Rais wa Kenya, Dkt. William Ruto, pamoja na familia ya marehemu, kupitia kaka yake, Seneta wa Siaya, Oburu Oginga.

​Inaripotiwa kuwa Odinga amekutwa na umauti akiwa nchini India, ambako alikuwa akipokea matibabu katika Hospitali ya Sreedhareeyam Ayurvedic huko Kerala. Vyanzo vya habari vinaeleza kuwa kiongozi huyo mkongwe wa siasa alipatwa na shambulio la ghafla la moyo (cardiac arrest) wakati akifanya mazoezi ya asubuhi, hali iliyopelekea uhai wake kutoweka. Alikuwa amesafirishwa kwenda India tangu Oktoba 3, 2025, kwa uangalizi zaidi wa afya yake.

​Historia Fupi: Safari ya Miaka Mingi Katika Siasa za Kenya

​Kifo cha Odinga kinahitimisha sura muhimu sana katika historia ya kisiasa ya Kenya. Alizaliwa Januari 7, 1945, na alikuwa mtoto wa Makamu wa Kwanza wa Rais wa Kenya, Mzee Jaramogi Oginga Odinga. Alipata elimu yake ya uhandisi wa mitambo na umeme nchini Ujerumani Mashariki.

​Akiwa anatajwa kama "Mchochezi wa Demokrasia," Odinga alitumia jumla ya miaka tisa gerezani bila kufunguliwa mashtaka katika miaka ya 80 na 90, akipigania mfumo wa vyama vingi.

​Nafasi za Uongozi alizowahi kushika:

​Waziri Mkuu: Kati ya mwaka 2008 na 2013, nafasi aliyoshikilia katika Serikali ya Umoja wa Kitaifa.

​Waziri wa Nishati (2001-2002) na Waziri wa Barabara, Ujenzi na Makazi (2003-2005).

​Mbunge wa Lang'ata (1992).

​Licha ya kugombea kiti cha urais wa Kenya mara tano, na kushindwa mara zote, ushawishi wake ulibaki kuwa mkubwa, akiongoza Chama cha Orange Democratic Movement (ODM). Tukio lake la kihistoria la "Handshake" na Rais Uhuru Kenyatta mwaka 2018 lilisifika kwa kuleta utulivu mkubwa wa kisiasa nchini humo.

​Kifo chake kinatokea wakati ambapo hivi karibuni alikuwa amegombea nafasi ya Mwenyekiti wa Tume ya Umoja wa Afrika. Kenya, kwa sasa, inaomboleza kuondokewa na kiongozi ambaye alikuwa nembo ya upinzani na demokrasia barani Afrika.