BAGAMOYO, PWANI. Katika tukio lililochanganya ucheshi, ukongwe na ujumbe mzito wa kisiasa, Mwenyekiti Mstaafu wa Chama Cha Mapinduzi (CCM) na Rais wa Awamu ya Nne wa Jamhuri ya Muungano wa Tanzania, Jakaya Mrisho Kikwete, amezima uvumi wa kifo chake kwa maneno yaliyotikisa uwanja wa Mwakalenge, wilayani Bagamoyo.
Kikwete, ambaye alihutubia mamia ya wananchi waliofurika katika mkutano wa kampeni wa CCM, alionekana mwenye afya njema, tabasamu la bashasha na nguvu zile zile zilizompa umaarufu wakati wa utumishi wake wa miaka kumi Ikulu. Akiwa amevalia kwa mtindo wake wa kitamaduni, Kikwete alimtumia jukwaa hilo kumnadi mgombea mwenza wa urais wa CCM, Dk. Emmanuel Nchimbi, huku akitoa majibu ya moja kwa moja kwa uvumi ulioenea mitandaoni kuhusu hali yake ya kiafya.
“Nisikilizeni vizuri,” alisema kwa msisitizo huku akipigiwa makofi na vigelegele. “Mimi mzima wa afya kama ninavyosimama hapa. Sina hata kichomi.” Kauli hiyo ilizua shamrashamra uwanjani, lakini ilikuwa ni sentensi iliyofuata iliyoleta ukimya wa sekunde chache kabla ya kelele za shangwe kulipuka tena.
“Wale wanaoniombea mabaya, watatangulia wao,” aliongeza kwa sauti ya ukakamavu. “Mimi nitakuja kushiriki mazishi yao. Hiyo ndiyo ajenda yangu.”
Tamko hilo lilitafsiriwa na wachambuzi wa siasa kama ishara ya uthabiti na uhai wa kisiasa wa Kikwete, kiongozi ambaye licha ya kustaafu, bado anaendelea kuwa nguzo muhimu na alama ya umoja ndani ya chama chake.
Kikwete alitumia hotuba hiyo kumpongeza Dk. Nchimbi kwa kuteuliwa kuwa mgombea mwenza wa urais wa CCM, akimtaja kama kiongozi kijana mwenye uzoefu, busara na uadilifu. Alisema anamfahamu kwa muda mrefu na amekuwa akionesha uwajibikaji na uaminifu katika kila nafasi aliyopewa, hivyo anastahili kuwa msaidizi mkuu wa Rais Samia Suluhu Hassan katika kuendeleza ajenda ya maendeleo.
Dk. Nchimbi naye alimshukuru Rais mstaafu kwa ushauri na mchango wake endelevu ndani ya chama, akiahidi kuendelea kutekeleza miradi mikubwa ya kimkakati wilayani Bagamoyo, ikiwemo ujenzi wa kituo kikubwa cha biashara cha kisasa (Shopping Mall), stendi ya mabasi ya kisasa, na upanuzi wa huduma za maji, elimu na afya.
Mgombea ubunge wa Bagamoyo, Subra Mugalu, alieleza kuwa katika kipindi cha miaka minne, zaidi ya Shilingi bilioni 27 zimetumika katika kutekeleza miradi ya maendeleo katika wilaya hiyo, hatua iliyosaidia kuboresha huduma za kijamii, kupunguza vifo vya akina mama wajawazito, na kuongeza upatikanaji wa maji safi hadi kufikia asilimia 95.
0 Comments