Mwanamuziki maarufu na sasa mwanasiasa, Clayton Revocatus Chipando, anayefahamika zaidi kwa jina la kisanii Baba Levo, ameandika ukurasa mpya wa safari yake ya maisha kwa kuzindua rasmi kampeni zake za ubunge katika Jimbo la Kigoma Mjini kupitia Chama Cha Mapinduzi (CCM). Tukio hilo lililofanyika Septemba 9, 2025, limevuta hisia kubwa si tu kwa wakazi wa Kigoma, bali pia kwa mashabiki wake kote nchini.
Katika hotuba yake ya uzinduzi, Baba Levo alionekana kuunganisha lugha ya kisiasa na usanii, akiwahakikishia wananchi kuwa nia yake ni kuwaletea mabadiliko chanya:
Nilisimama na nyie kuwatetea kwa kila hali, lakini pia kuhakikisha hakuna anayewanyanyasa katika mkoa huu. Acheni nikafanye ‘uchawa’, nyie mpate maendeleo Kigoma,” alisema kwa msisitizo ulioibua nderemo kutoka kwa umati wa wafuasi wake.
Wananchi walijitokeza kwa wingi kushuhudia tukio hilo, na hali ya “nyomi” iliyoibuka ilithibitisha ukubwa wa hamasa kwa mgombea huyu anayeunganisha sauti ya muziki na ujumbe wa kisiasa.
Baba Levo alieleza kuwa safari yake ya kisiasa imejengwa juu ya imani ya mshikamano na mshirikiano kati ya wananchi na viongozi wao. Aliwahimiza wananchi kumpa nafasi ya kutimiza ndoto ya kuibadilisha Kigoma kuwa kitovu cha maendeleo na usalama wa kijamii.
Mbali na maneno ya hamasa, alifafanua kwa undani sera na vipaumbele vyake, vikiwemo:
- Kuimarisha miundombinu ya barabara ili kuvutia uwekezaji na kurahisisha shughuli za kibiashara.
- Kuweka kipaumbele kwa huduma za kijamii, ikiwemo elimu bora na afya yenye upatikanaji wa haki.
- Kuwapa vijana na wanawake nafasi kubwa zaidi katika miradi ya kiuchumi na kijamii.
- Kulinda heshima na usalama wa wananchi wa Kigoma kwa kuhakikisha sauti zao zinasikika bungeni.
Kwa kuunganisha ushawishi wake kama msanii wa Bongo Fleva mwenye ushawishi mkubwa na nafasi yake mpya ya kisiasa, Baba Levo ameonyesha kuwa siasa ya Tanzania sasa inavuka mipaka ya kawaida. Wengi wanaona kuwa mgombea huyu anaweza kuibadilisha Kigoma Mjini kuwa mfano wa maendeleo kupitia nguvu ya wananchi na ubunifu wa kisasa.
0 Comments