Bingwa wa Olimpiki na mmiliki wa rekodi ya dunia, Beatrice Chebet, ameandika historia mpya baada ya kutwaa ushindi wa mbio za wanawake za mita 10,000 kwenye Mashindano ya Dunia ya Riadha 2025 mjini Tokyo, Japan. Ushindi huo umempa Kenya medali yake ya kwanza katika mashindano hayo mwaka huu.
Chebet, ambaye alionekana mwenye ari kubwa, aliongeza kasi kwenye mzunguko wa mwisho na kufika mstari wa mwisho kwa muda wa dakika 30:37.61. Huu ni mwanzo bora kwake katika mbio za masafa marefu, huku akilenga kuendeleza mafanikio katika mashindano mengine ya mita 5,000 na 10,000 jijini Tokyo — mwendelezo wa upeo alioufikia kwenye Michezo ya Olimpiki ya Paris mwaka 2024.
Akizungumza baada ya ushindi huo, Chebet alisema:
"Zilikuwa mbio ngumu, zilizojaa changamoto, lakini niliamua kujituma zaidi kwenye mita 800 za mwisho. Nilihisi kana kwamba nipo kwenye mbio za mita 1500. Nilitaka sana medali hii ya dhahabu, kwa kuwa sikuwahi kushinda dhahabu kwenye mashindano ya dunia, na leo nilijua ni lazima nipate."
Katika nafasi ya pili alimaliza Nadia Battocletti kutoka Italia, aliyojishindia fedha, huku Gudaf Tsegay wa Ethiopia akikamilisha tatu bora na kubeba medali ya shaba.
Kwa ushindi huu, Chebet ameendeleza heshima ya Kenya katika ulimwengu wa riadha na kuthibitisha kuwa bado ni malkia wa mbio za masafa marefu duniani.
0 Comments