Bukoba, Kagera – Mgombea mwenza wa kiti cha Urais wa Jamhuri ya Muungano wa Tanzania kupitia Chama Cha Mapinduzi (CCM), Balozi Dk. Emmanuel John Nchimbi, ameonyesha mfano wa siasa yenye kugusa maisha ya watu baada ya kuamua kumfuata na kumsikiliza mlemavu wa miguu, Amos Kalungula, katika mkutano wa kampeni uliofanyika leo Septemba 7, 2025.
Dk. Nchimbi, ambaye yuko mkoani Kagera kuendelea na mikutano ya kampeni kuelekea Uchaguzi Mkuu wa Oktoba 29, aliwasili katika Uwanja wa Shule ya Msingi Kashai, Bukoba Mjini, ambapo alihutubia mamia ya wananchi waliojitokeza kumsikiliza.
Mara baada ya kumaliza hotuba yake, aliona Kalungula aliyekuwa ameshika bahasha ya rangi ya kaki. Akiwa ameketi upande wa umati, Kalungula alimkaribia Dk. Nchimbi na kumpa bahasha hiyo. Ingawa haijafahamika kilichokuwemo ndani ya bahasha, kitendo hicho kilionyesha imani ya wananchi kwa viongozi wao.
> “Kiongozi bora si yule anayehutubia tu, bali ni yule anayesikia na kugusa maisha ya kila mmoja wetu,” alisema mmoja wa wananchi waliokuwa wakishuhudia tukio hilo.
Kitendo cha Dk. Nchimbi kuamua kumsikiliza mlemavu huyo kimeibua hisia za mshikamano na upendo, huku wananchi wakipongeza namna viongozi wa CCM wanavyohusiana moja kwa moja na wananchi bila kujali hali zao za maisha.
Kwa mujibu wa mashuhuda, Kalungula alionekana kufurahishwa na heshima aliyopata, jambo lililoongeza shangwe katika mkutano huo wa kampeni.
0 Comments