Katika hotuba yake, Dkt. Nchimbi aliweka wazi kwamba kura za wananchi ndizo zitakazoamua mustakabali wa taifa, hivyo akasisitiza kuwa ni wajibu wa kila mwananchi kuhakikisha anashiriki ipasavyo katika uchaguzi.
> “Ndugu zangu wa Handeni, leo nimekuja mbele yenu kwa niaba ya mgombea wetu wa urais, Dkt. Samia Suluhu Hassan, naomba tushirikiane kuhakikisha tunakipigia kura chama chetu kwa wingi. Tukishinda kwa kishindo, tutakuwa tumetoa nafasi kwa miradi yote mikubwa ya maendeleo kuendelea na kwa wananchi kunufaika moja kwa moja,” alisema Dkt. Nchimbi huku akishangiliwa na umati wa wananchi.
Aliongeza kuwa Dkt. Samia ameonyesha uongozi thabiti tangu achaguliwe, akitoa kipaumbele kwa miradi ya kijamii, uchumi na sekta za huduma kama elimu, afya na miundombinu, jambo ambalo linapaswa kuendelezwa kupitia kura za wananchi.
Hotuba ya Dkt. Nchimbi Handeni ilikuwa sehemu ya ziara yake ya kampeni zinazofanyika nchi nzima kuelekea Uchaguzi Mkuu. Tangu kuanza rasmi kwa kampeni, tayari amefanya mikutano katika mikoa 11, ambapo amekuwa akisisitiza mshikamanisho wa chama na wananchi.
Kwa mujibu wa taarifa ya CCM, ziara hizo zimempa nafasi ya kusikiliza changamoto za wananchi na kuzitolea ufafanuzi kupitia sera za ilani ya chama hicho. Miongoni mwa changamoto alizozungumzia mara kwa mara ni pamoja na upatikanaji wa huduma bora za kijamii, ajira kwa vijana, ujenzi wa miundombinu ya barabara, na upatikanaji wa maji safi na salama.
Katika mkutano wa Handeni, Dkt. Nchimbi alitumia fursa hiyo kueleza baadhi ya mafanikio makubwa yaliyopatikana chini ya uongozi wa CCM. Alisema kuwa Serikali ya Awamu ya Sita imewekeza kwa kiasi kikubwa katika sekta ya barabara, reli, nishati na kilimo, hatua ambazo zimelenga kuinua maisha ya Watanzania wote.
Aidha, alieleza kuwa CCM imeendelea kuwekeza katika miradi ya kimkakati ikiwemo mradi wa reli ya kisasa (SGR), bwawa la umeme la Julius Nyerere (JNHPP) na programu za elimu bure, ambazo kwa pamoja zimebadilisha maisha ya mamilioni ya Watanzania.
> “CCM si chama cha maneno matupu, ni chama cha vitendo. Tumeona ujenzi wa madaraja, hospitali, barabara na shule. Tumeshuhudia ajira zikiongezeka, wanawake wakipata nafasi zaidi kwenye uongozi na vijana wakihimizwa kujiingiza kwenye ujasiriamali. Haya yote yanatokana na uimara wa chama chetu,” alisema Dkt. Nchimbi.
Shughuli za kampeni leo Handeni zilipambwa na hamasa kubwa ya wananchi waliokuwa na bendera za kijani na njano, wakipiga makofi na kuimba nyimbo za kuhamasisha ushindi wa CCM. Wananchi walijitokeza kwa wingi licha ya jua kali, hali iliyoonyesha mshikamano wao na chama hicho.
Baadhi ya wananchi walionekana wakiwa na mabango yenye jumbe mbalimbali za kuunga mkono uongozi wa Dkt. Samia Suluhu Hassan na mgombea mwenza wake, wakieleza kuwa wamefurahishwa na kasi ya utekelezaji wa miradi ya maendeleo.
> “Tumeona barabara zikijengwa, huduma za afya kuboreshwa na watoto wetu wakisoma bure. Tunaamini CCM ikipewa tena ridhaa, mambo yatakuwa bora zaidi. Kwa hiyo sisi kama wananchi tupo tayari kumpa Dkt. Samia na timu yake kura zetu zote.”
Katika mkutano huo, viongozi mbalimbali wa CCM mkoani Tanga walihudhuria na kutoa hamasa kwa wananchi kuhakikisha wanashiriki uchaguzi. Walisema kuwa ushindi wa chama hicho si tu kwa faida ya wagombea, bali ni kwa maslahi ya taifa lote kwa kuwa sera zake zimethibitishwa kwa vitendo.
Aidha, walieleza kuwa wananchi wa Tanga kwa muda mrefu wamekuwa ngome ya CCM na kwamba mwaka huu chama kinatarajia kupata ushindi mkubwa zaidi kutokana na mwamko unaoendelea kuonekana.
Uchaguzi Mkuu wa mwaka huu unatarajiwa kufanyika Oktoba 29, 2025, ambapo wananchi wa Tanzania Bara na Zanzibar watapiga kura kumchagua Rais, Wabunge, Wawakilishi na Madiwani. CCM kupitia mgombea wake wa urais Dkt. Samia Suluhu Hassan, imekuwa ikinadi sera na mafanikio yake, huku vyama vya upinzani navyo vikiendelea na mikutano yao ya kampeni.
Dkt. Nchimbi alisisitiza kuwa mshindi wa kweli ni wananchi endapo watashiriki uchaguzi kwa amani, mshikamano na kujitokeza kwa wingi siku ya kupiga kura.
> “Uchaguzi ni demokrasia. Tunawaomba wananchi wote washiriki bila hofu, kwa sababu chama chetu kimejipanga kuendeleza maendeleo na kulinda amani ya nchi. Tukipata kura nyingi, tutahakikisha Tanzania inasonga mbele kwa kasi kubwa zaidi,” alieleza Dkt. Nchimbi.
Ziara ya kampeni ya Dkt. Emmanuel Nchimbi mkoani Tanga imefungua ukurasa mpya wa hamasa kwa wananchi wa Handeni, ambapo ujumbe wake wa mshikamano, amani na maendeleo umeonekana kuwagusa wengi. Kadri siku zinavyosogea kuelekea Oktoba 29, CCM imekuwa ikitumia mikutano yake kusisitiza ilani ya chama na kushirikisha wananchi katika mchakato wa kidemokrasia.
Kwa mujibu wa wachambuzi wa siasa, ziara za kampeni za Dkt. Nchimbi na Dkt. Samia ni sehemu ya mkakati mpana wa chama hicho kuhakikisha kinashinda uchaguzi kwa kishindo, huku kikiendeleza historia yake ya kuwa chama kinachoongoza taifa tangu uhuru.
0 Comments