Kikosi cha Simba Sports Club, maarufu kama Wekundu wa Msimbazi, kimewasili salama nchini Botswana kwa ajili ya mchezo wa hatua ya awali ya Ligi ya Mabingwa Afrika (CAF Champions League) dhidi ya wenyeji Gaborone United.
Mchezo huo unatarajiwa kupigwa Ijumaa, Septemba 20, kwenye Uwanja wa Obed Itani Chilume uliopo mjini Francistown, na tayari mashabiki wa soka barani Afrika wanasubiri kwa hamu burudani hiyo ya aina yake.
Simba SC imeingia Botswana ikiwa na dhamira ya kupata matokeo mazuri ugenini, jambo ambalo litawaweka katika nafasi nzuri ya kusonga mbele kwenye hatua ya kwanza ya michuano hiyo mikubwa barani Afrika. Timu hiyo imekuwa na rekodi nzuri katika mashindano ya CAF kwa miaka ya hivi karibuni, ikiwahi kufika hatua ya robo fainali na nusu fainali, jambo linaloongeza matarajio ya mashabiki wake.
Aidha, wachezaji na benchi la ufundi wameahidi kupambana kwa nguvu zote kuhakikisha wanapata ushindi au angalau matokeo ya ugenini yatakayorahisisha kazi kwenye mchezo wa marudiano jijini Dar es Salaam. Mashabiki wa Simba SC waliopo Botswana na nchi jirani pia wanatarajiwa kujitokeza kwa wingi kuisapoti timu yao.
Kwa upande mwingine, Gaborone United nao wamesema hawatakuwa wepesi kufungwa mbele ya mashabiki wao, jambo linaloashiria pambano la ushindani mkali. Timu hiyo ya Botswana imejipanga kuhakikisha inawapa changamoto kubwa wageni wao kutoka Tanzania.
Simba SC imekuwa moja ya vilabu vinavyoipeperusha vyema bendera ya Tanzania na Afrika Mashariki katika mashindano ya kimataifa, na safari hii inalenga kuendeleza historia yake ya mafanikio na kulinda heshima yake barani Afrika.
0 Comments