Dodoma, Novemba 13, 2025 — Rais wa Jamhuri ya Muungano wa Tanzania, Mhe. Samia Suluhu Hassan, amemteua Dk. Mwigulu Lameck Nchemba Madelu kuwa Waziri Mkuu mpya wa Serikali ya Awamu ya Sita, uteuzi uliothibitishwa na Bunge leo mjini Dodoma. Uteuzi huu umevutia hisia nyingi nchini kutokana na historia yake ya kipekee, inayomuonesha mtu aliyepanda kutoka maisha ya kawaida ya kijijini hadi kushika nafasi ya juu kabisa katika uongozi wa taifa.
Dk. Mwigulu Nchemba, mwenye umri wa miaka 50, anatokea mkoani Singida na ametajwa mara nyingi kama mfano halisi wa mafanikio yanayotokana na bidii, nidhamu na kujituma. Alikulia katika familia ya kawaida ya wafugaji, akiwahi kuchunga ng’ombe, jambo lililomjengea uvumilivu na heshima kwa kazi. Alianza masomo katika Shule ya Msingi Makunda, kisha akaendelea na Ilboru Sekondari na Mazengo Sekondari. Baadaye, alijiunga na Chuo Kikuu cha Dar es Salaam, ambako alipata shahada ya kwanza, ya uzamili na hatimaye ya uzamivu katika uchumi.
Safari yake ya kisiasa ilianza mwaka 2010 aliposhinda ubunge wa Jimbo la Iramba Magharibi kupitia Chama Cha Mapinduzi (CCM), na kuchaguliwa tena mwaka 2015. Ndani ya chama hicho, ameshika nyadhifa mbalimbali za uongozi na kuonyesha uwezo mkubwa wa kiutendaji. Katika serikali, amewahi kushika nafasi muhimu ikiwemo Naibu Waziri wa Fedha (2012–2014), Waziri wa Kilimo, Mifugo na Uvuvi (2015), Waziri wa Mambo ya Ndani ya Nchi (2016–2018), na Waziri wa Fedha na Mipango (2021–2025).
Mwaka 2018, aliondolewa katika wadhifa wa Waziri wa Mambo ya Ndani na Rais wa wakati huo, Hayati John Pombe Magufuli, kutokana na changamoto zilizokuwa zikikabili wizara hiyo, lakini alibaki kuwa miongoni mwa wanasiasa wenye ushawishi mkubwa ndani ya CCM. Uteuzi wake wa sasa kama Waziri Mkuu umeibua hisia mseto miongoni mwa wananchi na wachambuzi wa masuala ya kisiasa, huku wengi wakimpongeza kwa ujasiri, uzoefu na uadilifu wake.
Baada ya kuwasilishwa jina lake bungeni na kuthibitishwa kwa kura nyingi za ndiyo, Dk. Nchemba aliahidi kufanya kazi kwa bidii na kuhakikisha serikali inasimama imara katika kutekeleza Dira ya Taifa ya 2050. Aliahidi kusimamia upatikanaji wa ajira, uwajibikaji kwa watumishi wa umma, na kuhakikisha sauti za Watanzania wote zinasikika. Katika hotuba yake baada ya kuidhinishwa, alisema atatumia “fyekeo na rato” kwa watumishi wasiotimiza wajibu wao, akisisitiza kwamba nidhamu, maadili na ufanisi vitakuwa dira ya uongozi wake.
Dk. Nchemba amekuwa akijulikana kwa kauli zenye msisitizo na uzalendo, mara nyingi akionekana amevaa skafu yenye rangi za bendera ya taifa. Moja ya kauli zake zilizowahi kuvuma ilikuwa mwaka 2021 aliposema, “anayehisi afadhali kuhamia Burundi, basi aende tu,” akisisitiza umuhimu wa kulipa kodi na kuunga mkono juhudi za serikali.
Kwa uteuzi huu, Dk. Mwigulu Nchemba anakuwa Waziri Mkuu wa 12 wa Jamhuri ya Muungano wa Tanzania tangu uhuru, akimrithi Kassim Majaliwa Majaliwa anayemaliza muda wake. Katika hotuba yake ya shukrani, alimalizia kwa kusisitiza amani, umoja na kumtanguliza Mungu katika kila hatua ya uongozi wake, akisema, “Serikali hii itasikiliza wananchi, itafanya kazi kwa bidii, na itahakikisha kila Mtanzania anaguswa na matokeo ya maendeleo.”
0 Comments